Alba Brojka

Alba beson se ndryshimi është i mundur kur njerëzit fuqizohen, një bindje që e ndjek në të gjithë punën e saj në mbështetje të demokracisë në Ballkanin Perëndimor dhe veçanërisht në Shqipëri. Ajo është shkencëtare politike dhe ka qenë pjesë e institucioneve kombëtare, rajonale dhe ndërkombëtare, duke përfshirë Organizatën për Siguri dhe Bashkëpunim në Evropë, Fondacionin Evropian për Demokraci, Zyrën Rajonale të Bashkëpunimit Rinor dhe Ministrinë për Evropën dhe Punët e Jashtme.

Alba ka kontribuar dhe ka qenë vullnetare në nisma të ndryshme qytetare dhe rinore në vendin e saj dhe në rajon. Ajo është gjithashtu një avokate e zjarrtë për mbrojtjen e natyrës dhe burimeve të saj, duke promovuar një stil jetese të qëndrueshëm.

Alba është specialiste e analizave të politikave publike, mbështetjes së demokracisë (OJQ & media), menaxhimit të projekteve, për përfshirjen e të rinjve dhe për perspektivën gjinore. Ajo ka ndjekur trajnime mbi lidershipin nga Harvard Kennedy School, është pjesë e rrjetit Transatlantic Inclusion Leaders Network të German Marshall Fund dhe ka fituar bursën prestigjioze Chevening.

Alba ka një diplomë MPA në Teknologji Digjitale dhe Politika Publike nga University College London dhe një MA në Marrëdhënie Ndërkombëtare dhe Diplomaci të BE-së nga College of Europe. Gjithashtu, ajo ka përfunduar studimet në Shkencat Politike në University of New York Tirana dhe në Drejtësi në Universitetin e Tiranës.