PPNEA dhe “Shpendët e Shqipërisë” gjatë një nisme të përbashkët për monitorimin e kalimit të shpendëve grabiqarë në vend, ka mundur të gjejë fjetoren e parë në Shqipëri të skifterit këmbëkuq (Falco vespertinus).
Skifteri këmbëkuq është shpend i Afrotropikut dhe Palearktikut. Folezon në Evropën lindore dhe Azinë qendrore. Në vendin tonë është kalimtar dhe në dijeninë tonë ende nuk është raportuar si folezues, ndonëse si i tillë është raportuar në vendin fqinj të Malit të Zi. Dimëron në pjesën jugore të kontinentit Afrikan.
Ky lloj mbart statusin “Afër Kërcënimit” (NT) në nivel global, për arsye se popullata globale e llojit dhe veçanërisht ajo Evropiane ka pësuar një rënie të ndjeshme që nga 1970. Ky lloj duhet të listohej dhe nëlistën e kuqe të faunës së egër por kjo gjë nuk ka ndodhur.
Fjetorja u gjend në zonën e Lushnjes dhe u monitorua për 3 ditë rresht nga grupi i punës. Një numër nga 15-17 individë të këtij lloji u vrojtuan rregullisht në këtë fjetore. Shpendët fillojnë të grumbullohen në zonën rreth fjetores gjatë orëve të para të muzgut dhe zënë vend të gjithë në fjetore në mbarim të muzgut.
Është me interes të madh që fjetorja të monitorohet në vazhdim, së paku deri në mesin e këtij muaji për të parë ndryshimin e numrave, si dhe në të njëjtën kohë të monitorohen edhe zona të tjera të vendit për gjetjen e fjetoreve të ngjashme, sikundër është zona e Luginës së Drinos, etj.
©PPNEA
©PPNEA
©PPNEA
