Në kuadër të Projektit Interreg LASPEH 2.0, Organizata për Ruajtjen dhe Mbrojtjen e Mjedisit Natyror në Shqipëri (PPNEA) po udhëheq zhvillimin dhe zbatimin e një Plani Ruajtje dhe aktiviteteve konkrete për ruajtjen e dallëndyshes së detit ballëbardhë (Sternula albifrons) në Lagunat e Nartës dhe Karavastasë.
Në përputhje me objektivat për harmonizimin e planifikimit të ruajtjes të natyrës me EU Nature Restoration Law dhe për forcimin e efektivitetit të rrjetit Natura 2000 dhe zonave të mbrojtura, PPNEA synon të kontraktojë ekspertë të kualifikuar për hartimin e një Plani Ruajtje gjithëpërfshirës, të bazuar në fakte shkencore, për këtë lloj.
Informacion për Projektin
LASPEH 2.0 synon të zhvillojë Plane Ruajtje për habitatet dhe llojet prioritare në Adriatikun e Jugut, në përputhje me Ligjin e BE-së për Restaurimin e Natyrës. Procesi do të përfshijë:
- Identifikimin e boshllëqeve në menaxhimin e zonave të mbrojtura dhe zbatimin e rrjetit Natura 2000;
- Vlerësimin e legjislacionit ekzistues kombëtar dhe të BE-së, si dhe procedurave që lidhen me mbrojtjen e natyrës;
- Përmirësimin e nivelit të ruajtjes, dokumentacionit teknik dhe performancës së ruajtjes në rajonet pjesëmarrëse;
- Mbledhjen e të dhënave të reja në terren (kur është e nevojshme);
- Organizimin e seminareve teknike lokale me ekspertë dhe aktorë të interesit për përcaktimin dhe vlerësimin e masave të ruajtjes;
Plani i Ruajtjes për dallëndyshen e detit ballëbardhë do të hartohet në përputhje me këto objektiva të përgjithshme dhe do të kontribuojë në krijimin e një Strategjie të Përbashkët për mbrojtjen e llojeve dhe habitateve në Adriatikun e Jugut.
Detyrat e Ekspertit/ Ekspertëve
Të kryejë një rishikim (desk review) të:
- Literaturës ekzistuese, të dhënave të monitorimit dhe studimeve mbi Sternula albifrons;
- Direktivave përkatëse të BE-së (Direktiva e Shpendëve, Direktiva e Habitateve), Ligjit të BE-së për Restaurimin e Natyrës dhe legjislacionit kombëtar;
- Planeve aktuale të menaxhimit dhe masave të ruajtjes në zonat e mbrojtura përkatëse.
Të vlerësojë:
- Statusin aktual të ruajtjes së llojeve në zonat e synuara në Shqipëri;
- Kërcënimet dhe presionet kryesore;
- Boshllëqet në menaxhim dhe zbatim;
- Faktorët socio-ekonomikë që ndikojnë në ruajtjen e llojeve.
Të zhvillojë një Plan Ruajtje që përfshin:
- Objektiva konservimi (afatshkurtra, afatmesme dhe afatgjata);
- Veprime specifike dhe të matshme;
- Kornizë monitorimi dhe indikatorë;
- Strategji për përfshirjen e aktorëve të interesit;
- Aspekte buxhetore dhe të zbatimit;
- Vlerësim të rreziqeve dhe masa zbutëse.
- Të marrë pjesë në të paktën një seminar/punëtori teknike lokale për të prezantuar gjetjet paraprake dhe për të integruar komentet e aktorëve të interesit.
- Të dorëzojë Planin e Ruajtjes.
Produktet e Pritshme
- Analizë e detajuar e legjislacionit përkatës dhe e gjendjes aktuale të llojit, duke përfshirë kuadrin institucional dhe sfidat kryesore në zbatim;
- Draft i Planit të Ruajtjes;
- Prezantim në seminar me aktorët e interesit;
- Plan Final i Ruajtjes të llojit (i rishikuar dhe i validuar).
Kohëzgjatja
Angazhimi pritet të zgjasë 3 muaj, duke filluar nga data e nënshkrimit të kontratës.
Kualifikimet e Kërkuara
- Diplomë në biologji, ekologji, ornitologji ose fushë të ngjashme;
- Përvojë e dëshmuar në hartimin e planeve të ruajtjes për specie;
- Njohuri mbi legjislacionin mjedisor shqiptar dhe të BE-së (Direktiva e Shpendëve, Direktiva e Habitateve, Ligji i BE-së për Restaurimin e Natyrës);
- Përvojë në procese konsultimi me aktorë të interesit konsiderohet avantazh.
Procedura e Aplikimit
Ekspertët e interesuar ftohen të dërgojnë:
- CV;
- Letër motivimi;
- Ofertë financiare (shumë fikse, duke përfshirë të gjitha taksat).
Aplikimet duhet të dërgohen nga data 3 Mars deri më 15 Mars në adresën e emailit: [email protected] me subjektin: Aplikim – Plan Ruajtje për Sternula albifrons
Shënim: Mund të aplikoni si individ ose si skuadër.
