NJOFTIM PËR SHTYP – Kamerat kurth të PPNEA kanë regjistruar një rrëqebull të rritur së bashku me këlyshin e tij në Parkun Kombëtar të Shebenikut.

NJOFTIM PËR SHTYP – Kamerat kurth të PPNEA kanë regjistruar një rrëqebull të rritur së bashku me këlyshin e tij në Parkun Kombëtar të Shebenikut.

NJOFTIM PËR SHTYP

Një shenjë jete dhe shprese për rrëqebullin e Ballkanit në Shebenik, në një moment kritik për të ardhmen e popullatës

Kamerat kurth të PPNEA kanë regjistruar një rrëqebull të rritur së bashku me këlyshin e tij në Parkun Kombëtar të Shebenikut. Kjo dëshmi shkencore e riprodhimit vjen në një moment vendimtar për popullatën e rrezikuar në mënyrë kritike dhe përpjekjet për përforcimin e saj gjenetik.

Gjatë vjeshtës, në kuadër të monitorimit kombëtar me kamera kurth, PPNEA, në bashkëpunim me Administratën Rajonale të Zonave të Mbrojtura Elbasan, ka regjistruar një rrëqebull të rritur duke kaluar së bashku me këlyshin e tij në Parkun Kombëtar të Shebenikut. Pamjet ofrojnë një dëshmi të rëndësishme të riprodhimit në natyrë dhe informacion të vlefshëm për ruajtjen e këtij nënlloji.

Ky regjistrim vjen në një moment kritik për Programin e Rimëkëmbjes së Rrëqebullit të Ballkanit (BLRP), ndërsa programi po përgatitet për hapat e mëtejshëm drejt zbatimit të strategjisë për përforcimin gjenetik të popullatës. Rrëqebulli i Ballkanit (Lynx lynx balcanicus) mbetet i rrezikuar në mënyrë kritike, me një popullatë të vogël, prej kohësh të fragmentuar, që përballet me kërcënime ndaj mbijetesës dhe riprodhimit të tij.

Vrasja e paligjshme, humbja dhe fragmentimi i habitateve, si dhe diversiteti i ulët gjenetik mbeten ndër kërcënimet kryesore. Për një popullatë kaq të vogël dhe të izoluar, humbja e çdo individi apo përkeqësimi i kushteve ekologjike mund të ketë pasoja të mëdha dhe afatgjata.

Prania e këlyshit është një shenjë inkurajuese, por një regjistrim i vetëm nuk mjafton për të dëshmuar rritjen apo rimëkëmbjen e popullatës. Pikërisht për këtë arsye, kërkimi shkencor dhe monitorimi afatgjatë kanë rëndësi: na ndihmojnë të kuptojmë gjendjen e popullatës, të identifikojmë habitatet jetike dhe kërcënimet, si dhe të hartojmë masa ruajtjeje të mbështetura në të dhëna të verifikueshme. Kërkimi shkencor duhet të jetë në themel të vendimmarrjes që prek zonat e mbrojtura.

Parku Kombëtar i Shebenikut është një habitat jetik për rrëqebullin e Ballkanit. Pyjet, popullatat e kafshëve me të cilat ushqehet dhe korridoret ekologjike janë thelbësore për lëvizjen, ushqimin dhe riprodhimin e tij. Prania e dokumentuar e këlyshit është një tjetër dëshmi konkrete e rëndësisë së mbrojtjes së këtij ekosistemi, si një vend ku rrëqebujt mund të riprodhohen dhe të rrisin brezin e ardhshëm.

Në këtë kontekst, mbrojtja e natyrës dhe e zonave të mbrojtura është një përgjegjësi e përbashkët, thelbësore për ruajtjen e llojeve që varen prej tyre. Vendimmarrja që prek këto ekosisteme duhet të jetë transparente, të garantojë llogaridhënie dhe të marrë në konsideratë pasojat afatgjata. Ky këlysh është një arsye konkrete pse kjo përgjegjësi ka rëndësi: mbrojtja e habitatit të tij lidhet drejtpërdrejt me mundësitë e tij për të mbijetuar.

Mbrojtja e Shebenikut në tërësinë e tij është thelbësore pasi rrëqebulli ka nevojë për habitate të paprekura, territore të gjera dhe korridore ekologjike që i mundësojnë lëvizjen dhe mbijetesën. Ndërhyrje që kërcënojnë integritetin ekologjik të parkut, dëmtojnë habitatet apo ndërpresin lidhjet ekologjike duhet të parandalohen dhe luftohen aktivisht nga autoritetet përgjegjëse.

Për rrëqebullin e Ballkanit, ruajtja e habitatit nuk është një zgjedhje mes alternativash. Është kusht për mbijetesë.

 

Postime të ngjashme