Të mbledhur në grupe, me lopata dhe fidanë të rinj nëpër duar, anëtarët e rrjetit “Shpëtimtarët e Kalit të Qyqes” ndërmorën një aksion komunitar për mbjelljen e 600 pishave përgjatë territoreve të folezimit të kalit të qyqes (Neophron percnopterus).
Aksioni në fjalë tregoi më së miri se si një grup dashamirësish të natyrës mund të kontribuojnë për ruajtjen dhe ri-jetësimin e habitateve natyrore. Akoma më tej, ky proces afroi një numër të konsiderueshëm individësh me problematikat e panumërta me të cilat përballet kali i qyqes, duke rritur ndërgjegjësimin dhe përkatësinë e tyre kundrejt shkabës së fundit folezuese në Shqipëri.
Ekipi ynë falenderon Z. Auron Tare për bujarinë e treguar në ofrimin e 600 fidanëve të cilët u mbollën nga anëtarë të rrjetit “Shpëtimtarët e Kalit të Qyqes” përgjatë disa zonave në rajonin e Kurveleshit dhe Luginën e Drinos.
© PPNEA
© PPNEA
